မီဇိုရမ်ပြည်နယ် တွီဒန်းနှင့် ကာကီစစ်ရှောင်စခန်းတို့တွင် ဆန်၊ စောင်နှင့် ဆေးဝါးပစ္စည်းများ လှူဒါန်းမှုရရှိ
ဇန်နဝါရီလ ၂၃ ရက်၊ ၂၀၂၅။
အိန္ဒိယနိုင်ငံ၊ မီဇိုရမ်ပြည်နယ် တွီဒန်းနှင့် ကာကီစစ်ရှောင်စခန်းတို့တွင် The Ladies Organization နှင့် ပလက်ဝကောင်စီ၊ လူမှုဝန်ထမ်းနှင့် ကယ်ဆယ်ရေးဌာန၏ ချိတ်ဆက်ကူညီမှုဖြင့် ဂျပန်နိုင်ငံသား Mr. Mitsuri Sato အဖွဲ့က ဆန်၊ စောင်နှင့် ဆေးဝါးပစ္စည်းများ ၂၀၂၅ ခုနှစ် ဇန်နဝါရီလ ၂၀၊ ၂၁ ရက်နေ့တွင် လှူဒါန်းပေးကြောင်း ပလက်ဝကောင်စီ၊ လူမှုဝန်ထမ်းနှင့် ကယ်ဆယ်ရေးဌာနမှ ဆလိုင်းစိုးသန်းက ယနေ့ ဇန်နဝါရီလ ၂၃ ရက်နေ့တွင် ပြောသည်။
တွီဒန်းစစ်ရှောင်စခန်းတွင် ဆန် ၁၄၀ အိတ်၊ စောင် ၂၂၅ ထည် နှင့် ဆေးဝါးပစ္စည်းများကို ဇန်နဝါရီလ ၂၀ ရက်နေ့တွင် လှူဒါန်းမှုလက်ခံရရှိပြီး ကာကီစစ်ရှောင်စခန်းတွင် လည်း ဆန် (၉၁)အိတ်၊ စောင် ၁၃၀ ထည်နှင့် ဆေးဝါးပစွည်းများကို ဇန်နဝါရီလ ၂၀ ရက်နေ့တွင် လှူဒါန်းမှုလက်ခံရရှိကြောင်း သိရသည်။
“တွီဒန်းနဲ့ ကာကီစစ်ရှောင်စခန်းတွေမှာဆန်လှူဒါန်းပေးဝေတဲ့အခါမှာ လူတစ်ဦးချင်းစီအလိုက် ဝေပေးကြတယ်။ တွီဒန်းမှာစစ်ရှောင်ဦးရေ ၁၁၇၄ ဦးရှိတော့ တစ်ယောက်ကို ဆန် ၄ kg နှုန်းနဲ့ ဝေပေးတယ်။ စောင်ကိုကျတော့ အရင်စာရင်းရှိပြီးသား အိမ်ခြေအလိုက် ၂၂၅ ထည် ဝေပေးပြီး ဆေးဝါးပစ္စည်းတွေလည်းဝေပေးတာတွေ လုပ်တယ်။ ကာကီမှာကျတော့ စစ်ရှောင်ဦးရေ ၆၀၀ ခန့် ရှိတဲ့အတွက် တစ်ယောက်ကို ဆန် ၆ kg နှုန်းနဲ့ ရရှိတယ်။ စောင်အထည် ၁၃၀ ကိုဝေပေးပြီး ဆေးဝါးပစ္စည်းတွေကိုလည်း ဝေပေးတယ်။ စောင်တွေကျတော့ စာရင်းထဲပါတဲ့အတိုင်း ရရှိပြီးတော့ နောက်ထပ်အိမ်ခြေတိုးတာတွေ၊ စာရင်းမရရှိတာတွေကျတော့ ကျန်ခဲ့တယ်။ အဲဒီအတွက်တော့ စိတ်မကောင်းဘူး…” ဟု ပလက်ဝကောင်စီ၊ လူမှုဝန်ထမ်းနှင့် ကယ်ဆယ်ရေးဌာနမှ ဆလိုင်းစိုးသန်းက ပြောသည်။
သူက ဆက်လက်ပြီး “စစ်ရှောင်စခန်း ၂ ခုစလုံးမှာ The Ladies Organization က ကျား/မရေးရာ အကြမ်းဖက်မှုဆိုင်ရာ၊ လက်ရှိဖြစ်ပေါ်နေတဲ့ အကြမ်းဖက်မှုဆိုင်ရာတွေနဲ့ လူ့အခွင့်ရေးဆိုင်ရာ အကြောင်းတွေကို တစ်ရက်တာ အမြင်ဖွင့်ဟောပြောပွဲလည်း လုပ်ပေးတယ်…” ဟု ပြောသည်။
မီဇိုရမ်ပြည်နယ်အတွင်းရှိ စစ်ရှောင်စခန်းများတွင် စစ်ရှောင်များသည် စားဝတ်နေရေးအခက်အခဲများနှင့် အလုပ်အကိုင်အခက်အခဲများနှင့် ရင်ဆိုင်ကြုံတွေ့နေရပြီး ပြည်တွင်း၊ ပြည်ပမှ လူပုဂ္ဂိုတစ်ဦးချင်း သို့မဟုတ် အဖွဲ့အစည်းများမှ အကူအညီအထောက်အပံ့များစွာ လိုအပ်နေပြီး ယခုလအတွင်း ပလက်ဝဒေသခံအများအပြား အလုံးအရင်းနှင့် ပြောင်းရွှေ့မှုများရှိလာကာ မီဇိုရမ်ပြည်နယ်တွင် နေရပ်စွန့်ခွာပြောင်းရွှေ့လာသည့် ပလက်ဝဒေသခံ အိမ်ထောင်စု ၁၀၀၀ နီးပါးနှင့် လူဦးရေ ၄၅၀၀ ကျော် ရှိလာကာ နောက်ထပ်လည်း ဆက်လက်၍တိုးလာနိုင်ဖွယ်ရှိပြီး လူမှုဝန်ထမ်းနှင့် ကယ်ဆယ်ရေးဌာန တာဝန်ခံထံမှ သိရသည်။
သတင်း – James Roe
Photo by Salai Soe Than