CDF -Asho တပ်စိတ်မှူး တပ်ကြပ် ဆလိုင်းစိုးနိုင်ဝင်း ကျဆုံးကြောင်း ထုတ်ပြန်
မတ်လ ၂၉ ရက်၊ ၂၀၂၅။
ချင်းကာကွယ်ရေးတပ် – အရှို(CDF-Asho) တပ်စိတ်မှူး တပ်ကြပ် ဆလိုင်းစိုးနိုင်ဝင်းသည် ပြီးခဲ့သည့် မတ်လ ၂၅ ရက်နေ့တွင် ရှေ့တန်းတစ်နေရာတွင် မြင့်မြတ်စွာ ကျဆုံးခဲ့ကြောင်း CDF-Asho မှ မတ်လ ၂၆ ရက်နေ့တွင် အမိန့်ပြန်တမ်းထုတ်ပြန်ထားသည်ကို သိရသည်။
CDF – Asho တပ်စိတ်မှူး တပ်ကြပ် ဆလိုင်းစိုးနိုင်ဝင်းသည် အခြေခံစစ်ပညာသင်တန်း အပတ်စဉ် (၁) သင်တန်းဆင်း ရဲဘော်တစ်ဦးဖြစ်ပြီး ချင်းမျိုးနွယ်စုအားလုံးနှင့် အဖိနှိပ်ခံ ပြည်သူတစ်ရပ်လုံးကို ကာကွယ်သွားရန် တော်လှန်ရေးတာဝန်များကို အသက်နှင့် ခန္ဓာ စွန့်၍ထမ်းဆောင်ခဲ့သောကြောင့် ချင်းကာကွယ်ရေးတပ် – အရှို အနေဖြင့် အလေးအနက် ဂုဏ်ယူအသိမှတ်ပြုကြောင်း သိရသည်။
CDF – Asho အနေဖြင့် မပြီးပြတ်သေးသည့် တော်လှန်ရေးတာဝန်များကို ကျွန်ုပ်တို့ရဲဘော်အားလုံး အဆုံးတိုင် ဆက်လက်ထမ်းဆောင်သွားမည်ဖြစ်ကြောင်း တပ်စိတ်မှူး တပ်ကြပ် ဆလိုင်းစိုးနိုင်ဝင်း၏ ဝိညာဉ်ရှေ့မှောက် ကတိသစ္စာပြုကြောင်း အမိန့်ပြန်တမ်းထုတ်ပြန်ထားသည်ကို သိရသည်။
ချင်းကာကွယ်ရေးတပ် – အရှို(CDF-Asho) သည် မကွေးတိုင်းနှင့် ရခိုင်ပြည်နယ် နယ်စပ်တွင် အခြေစိုက်ကာ စစ်ရေးလှုပ်ရှားနေသည့် ချင်းတော်လှန်ရေး လက်နက်ကိုင်တပ်ဖွဲ့တစ်ခုလည်းဖြစ်ပြီး လက်ရှိတွင် နတ်ရေကန် လေကြောင်းရန်ကာကွယ်ရေး စခန်းလမ်းဟောင်းတွင် စစ်ဆင်ရေး လုပ်ဆောင်လျှက်ရှိကြောင်း သိရသည်။
သတင်း – James Roe