မင်းတပ်မြို့ကို အကြမ်းဖက် စစ်ကောင်စီတပ်က နှစ်ရက်ဆက်တိုက် လေကြောင်းဖြင့် ဗုံးကြဲတိုက်ခိုက်
ဧပြီလ ၃ ရက်၊ ၂၀၂၅။
ချင်းပြည်၊ မင်းတပ်မြို့ကို အကြမ်းဖက်စစ်ကောင်စီတပ်က နှစ်ရက်ဆက်တိုက် လေကြောင်းဖြင့် ဗုံးကြဲချတိုက်ခိုက်မှုကြောင့် အဆောက်အဦးတစ်ချို့ ထိခိုက်ပျက်စီးသွားကြောင်း မင်းတပ်မြို့နယ်ပြည်သူ့အုပ်ချုပ်ရေးအဖွဲ့က ဧပြီလ ၂ ရက်နေ့တွင် သတင်းထုတ်ပြန်ထားသည်ကို သိရသည်။
မင်းတပ်မြို့ပေါ်တစ်နေရာကို ဧပြီလ ၂ ရက် နေ့လည် ၁ နာရီခွဲခန့်တွင် အကြမ်းဖက် စစ်ကောင်စီတပ်က ဂျက်ဖိုက်တာဖြင့် ပေါင် ၅၀၀ ဗုံး နှစ်လုံး ကြဲချခဲ့သည့်အတွက် အဆောက်အဦး ၅ ခု အကြီးအကျယ်ပျက်စီးကာ အဆောက်အဦး ၅ လုံးမှာ အနည်းငယ် ပျက်စီးမှုရှိခဲ့ကြောင်း သိရသည်။
ထို့အပြင် မင်းတပ်မြို့ပေါ်ကို ဧပြီလ ၁ ရက်နေ့တွင်လည်း ပေါင် ၅၀၀ ဗုံး နှစ်လုံးဖြင့် တိုက်ခိုက်ခဲ့သည့်အတွက် ပြည်သူနေအိမ် ၃ လုံးထိခိုက်ပျက်စီးခဲ့ကြောင်း သိရသည်။
လေကြောင်းတိုက်ခိုက်မှုကြောင့် ပြည်သူလူထုများထိခိုက်ဒဏ်ရာရမှု မရှိကြောင်းနှင့် မြို့ပေါ်နေပြည်သူများအနေဖြင့် လေကြောင်းအန္တရာယ်ကို အထူးသတိထားကြရန် မင်းတပ်မြို့နယ်ပြည်သူ့အုပ်ချုပ်ရေးအဖွဲ့က အသိပေးထားကြောင်း သိရသည်။
နိုင်ငံတစ်ဝန်းရှိ မြို့နယ်အချို့တွင် ငလျင်ဘေးအန္တရာယ်ကြုံနေရချိန် အကြမ်းဖက် စစ်ကောင်စီတပ်သည် နိုင်ငံအနှံ့ လေကြောင်းဖြင့် ဗုံးကြဲတိုက်ခိုက်မှုများ ဆက်လက်လုပ်ဆောင်နေကြောင်း သိရသည်။
သတင်း – James Roe