ပလက်ဝမြို့နယ် ရှင်းလက်ချောင်းနှင့် ယုံလက်ချောင်ဒေသတွင် အေအေက  တပ်သားသစ် အတင်းအဓမ္မ စုဆောင်း

ပလက်ဝမြို့နယ် ရှင်းလက်ချောင်းနှင့် ယုံလက်ချောင်ဒေသတွင် အေအေက  တပ်သားသစ် အတင်းအဓမ္မ စုဆောင်း

ဧပြီလ ၂၃ ရက်၊ ၂၀၂၅။

ချင်းပြည်နယ်၊ ပလက်ဝမြို့နယ်၊ ရှင်းလက်ချောင်းထဲရှိ ရကန်ကျေးရွာမှ ပြည်သူအမျိုးသား ၄ ဦးကို AA ခန့် အုပ်ချုပ်ရေးမှူးမှ အတင်းအဓမ္မခေါ်ယူ AA တပ်ဖွဲ့ထံစစ်သင်တန်းတက်ရန်အတွက် ရွှေလိုက်ဝ ကျေးရွာအေအေ တပ်စခန်းတွင် ဧပြီလ ၁၆ ရက်နေ့ကတည်းက စစ်သင်တန်းတက်ရောက်နေကြောင်း ဒေသခံသတင်းရင်းမြစ်များ ၏ ယနေ့ ဧပြီ ၂၃ ရက်နေ့ သတင်းပေးပို့ချက်အရ သိရသည်။

စစ်သင်တန်းတက်ရန် စုဆောင်းခြင်းခံရသူများမှာ ပလက်ဝမြို့နယ်၊ ရကန်ကျေးရွာနေ ဦးကံဝှေ့ အသက် ၃၈နှစ် (ဘ ဦးအေးယိုး)၊ Akietie (ခ)  ဦးလာဗျတ်ဒီးကာ အသက် ၂၂နှစ် (ဘ ဦးပြည်ဝေး)၊ အန်အက်ကာ(ခ) ဦးကျော်ဆန်း အသက် ၃၆နှစ် (ဘ ဦးပုလော့)နှင့် မြိုလူမျိုးတစ်ဦးဖြစ်သည်။

“အေအေတွေက သူတို့ကိုယ်တိုင်လာပြီးတော့ ဖမ်းဆီးခေါ်ဆောင်သွားတာတော့ မဟုတ်ဘူး။ ဒါပေမဲ့ အေအေက ခန့်အပ်ထားတဲ့ ကျေးရွာအုပ်ချုပ်ရေးမှူး၊ အဖွဲ့ဝင်နဲ့ ကျေးရွာဘာသာရေးခေါင်းဆောင်တွေက တစ်ဖက်လှည့် ခေါ်ယူပြီး စေခိုင်းတာဖြစ်တယ်။ စစ်သင်တန်းတက်ဖို့အတွက် သူတို့က အတင်းအဓမ္မလုပ်တော့တာပဲ။             ဆိုတော့ အခု အေအေရဲ့စစ်သင်တန်းကျောင်းမှာ စေလွှတ်ခံရတဲ့ သူတို့ ၄ ယောက်ထဲမှာ ၃ ယောက်က ဇနီးသားမယားရှိ ပြီးတော့ သွားချင်တဲ့ဆန္ဒလည်းမရှိဘူး။ သူတို့ဇနီးတွေကလည်း ခွင့်မပြုဘူး။ သူတို့က အိမ်ထောင်ဦးစီးဆို တော့လေ၊ မိသားစုရဲ့စားဝတ်နေရေးအတွက် အဓိကရှာဖွေကျွေးမွေးနေရတယ်ဆိုတော့ အခုလို အေအေဆီမှာ စစ်သင်တန်းတက်တယ်ဆိုရင် အိမ်မှာ စားဝတ်နေရေး ဒုက္ခရောက်ကုန်မှာပေါ့။ ကျေးရွာအုပ်ချုပ်ရေးအဖွဲ့တွေရဲ့ အကြောင်းပြတာက ကျေးရွာလုံခြုံရေးအတွက်ကောင်းဖို့ကို အခုလိုစေလွှတ်ရတာဖြစ်တယ်ဆိုပြီးတော့ ပြော တယ်…” ဟု ဤအကြောင်းအရာကို သိသည့် ဒေသခံတစ်ဦးက ခူမီးမီဒီယာသို့ ပြောသည်။

ရွှေလိုက်ဝကျေးရွာရှိ အေအေ၏စစ်သင်တန်းကျောင်းတွင် ရောက်ရှိနေကြသူများမှာ ရှင်းလက်ချောင်းနှင့် ယုန် လက်ချောင်းဒေသမှ ဒေသခံပြည်သူများဖြစ်ပြီး မိမိစိတ်ဆန္ဒမပါဘဲ အေအေတပ်ဖွဲ့မှ အတင်းအဓမ္မ စစ်သင် တန်းတက်ရန် စုဆောင်းခံရသည့်သူများသာ အများအားဖြင့်ပါဝင်ပြီး သင်တန်းတက်ရောက်ပြီးမှသာလျှင် သူတို့ ရွာတွင် ပြန်လည်နေထိုင်ခွင့်ရရှိရေး အေအေတပ်ဖွဲ့ထံ ကျေးရွာအုပ်ချုပ်ရေးမှူးအနေနှင့် တောင်းဆို မည်ဟု ပြောကြောင်း ဒေသခံများ၏ သတင်းပေးပို့ချက်အရ သိရသည်။

“အေအေတွေက ကျွန်တော်တို့ဒေသမှာ လာပြီးတော့ အတင်းအဓမ္မစစ်သင်တန်းတက်ဖို့အတွက် လုပ်တယ်၊ လူငယ်လူလတ်ပိုင်းတွေက ငြင်းဆန်လို့မရဘူး၊ ငြင်းဆန်တယ်ဆိုရင် အပြစ်ပေးတယ်၊ သူတို့ကိုကြောက်လို့ အားလုံးက စစ်သင်တန်းတက်နေရတာ၊ ဘယ်သူမှ မလွန်ဆန်ရဲကြဘူး၊ ကြည့်ပါလား၊ စစ်သင်တန်းတက်ဖို့ ပို့ခံရတဲ့နေ့ကစပြီးတော့ မိသားစုညီအစ်ကိုမောင်နှမတွေနဲ့ အဆက်အသွယ်မရတော့ဘူး၊ သူတို့သင်တန်းတက် ပြီးတယ်ဆိုရင်လည်း ဘယ်လိုအခြေအနေတွေ လာအုံးမလဲဆိုတာ မသိသေးဘူး၊ အရင်က ကြားသိရတာတွေမှာ သင်တန်းဆင်းပြီးတဲ့လူတွေကို စစ်မြေပြင်ကို တန်းပို့တာတွေ၊ မိသားစုနဲ့အလှမ်းဝေးတဲ့နေရာတွေမှာ တန်းပို့တာ တွေ လုပ်ကြတယ်လို့ သိရတယ်၊ အခုလည်း ဒီလိုပဲ၊ သင်တန်းဆင်းပြီးတော့ သူတို့ကို ရွာမှာပြန်ပို့မယ်ဆိုတာတော့ အယုံအကြည်မရှိဘူး၊ သူတို့လုပ်နေကျ အရင်လမ်းစဉ်အတိုင်းပဲ လုပ်မြဲလုပ်နေမှာပဲ၊ ဒါကြောင့် ဒေသခံတွေ စိတ် ဆင်းရဲနေရတာ…”ဟု ဒေသခံတစ်ဦးက ခူမီးမီဒီယာသို့ ပြောသည်။

ပလက်ဝမြို့နယ် ရှင်းလက်ဝကျေးရွာတွင် ပြီးခဲ့သည့် ဖေဖော်ရီလထဲတွင်လည်း ဒေသခံ ၅၂ ဦးကို အေအေတပ်ဖွဲ့ က အတင်းအဓမ္မ စစ်မှုထမ်းရန်အတွက် နာမည်စာရင်းအတိအကျဖြင့်ခေါ်ယူကာ စစ်သင်တန်းကျောင်းသို့ ပို့ဆောင်ခဲ့ခြင်းပြုလုပ်ခဲ့ပြီးနောက် ယခုလတွင်လည်း ရကန်ကျေးရွာနှင့် ရှင်းလက်ချောင်း၊ ယုံလက်ချောင်းထဲရှိ ကျေးရွာများမှ ဒေသခံပြည်သူများကို အတင်းအဓမ္မစုဆောင်းမှုများ ပြုလုပ်လာခြင်း ဖြစ်သည်။

သတင်း – James Roe

ပုံ – ပေးပို့
ပုံစာ – ရှင်းလက်ဝကျေးရွာကိုမြင်ရပုံ။