ချင်းဒုက္ခသည်ကော်မတီ (CRC) က ကမ္ဘာ့ဒုက္ခသည်များနေ့တွင် မိမိတို့ရသင့်ရထိုက်သည့် အခွင့်အရေးများကို တောင်းဆိုဆန္ဒပြရန်နှင့် UNHCR ကကျင်းပသည့် ကမ္ဘာ့ဒုက္ခသည်များနေ့ အခမ်းအနားတွင် ပါဝင်ခြင်းမပြုရန် CRC ထုတ်ပြန်
ဇွန်လ ၁၆ ရက်၊ ၂၀၂၅။
ကမ္ဘာဒုက္ခသည်များနေ့ ကျရောက်မည့် ဇွန်လ ၂၀ ရက်နေ့တွင် မိမိတို့ ဒုက္ခသည်များရသင့်ရထိုက်သည့် အခွင့်အရေးများကို ဆန္ဒပြတောင်းဆိုရန်အတွက် ဇွန်လ ၁၄ ရက်နေ့တွင် ချင်းဒုက္ခသည်ကော်မတီ (CRC) က နယူးဒေလီမြို့ရောက် မြန်မာနိုင်ငံသားများကို ဖိတ်ကြားထားပြီး ကမ္ဘာ့ဒုက္ခသည်များနေ့ကို UNHCR အပါအဝင် မိတ်ဖက်အဖွဲ့ အစည်းများမှ နှစ်စဉ်နှစ်တိုင်း ကျင်းပပြုလုပ်သည့် အခမ်းအနားများတွင် ပူးပေါင်းပါဝင်ခဲ့ကြသော်လည်း ယခုနှစ်တွင် မြန်မာနိုင်ငံသားများ မည်သူမျှ မပါဝင်ကြရန် ဇွန်လ ၁၀ ရက်နေ့တွင် CRC က ထုတ်ပြန်ထားသည်ကို သိရသည်။
မြန်မာနိုင်ငံတွင် စစ်အာဏာရှင် အဆက်ဆက်ဖိနှိပ်မှုနှင့် ၂၀၂၁ ခုနှစ်တွင် ထပ်မံ အာဏာသိမ်းခဲ့မှုကြောင့် အိန္ဒိယနိုင်ငံ၊ နယူးဒေလီမြို့တွင် စစ်ဘေးရှောင်ဒုက္ခသည် မြန်မာပြည်သားများ ခိုလှုံနေရလျက်ရှိနေကာ ၁၉၅၁ ခုနှစ်မှ ကျင်းပလာခဲ့သည့် ကမ္ဘာဒုက္ခသည်နေ့သည် ယခုနှစ် ၂၀၂၅ ခုနှစ်တွင် ၇၄ နှစ်မြောက် တိုင်ခဲ့ပြီးဖြစ်သော်လည်း အိန္ဒိယနိုင်ငံတွင် ခိုလှုံနေသူအများစုကို UNHCR က ဒုက္ခသည်အဆင့်အတန်း အသိအမှတ်ပြုရန်ပျက်ကွက်ခြင်း၊ ကျန်းမာရေး၊ ပညာရေးနှင့် လူမှုဖူလုံရေးကိစ္စများတွင် ကာကွယ်စောင့်ရှောက်မှု မလုံလောက်သည့် အခြေအနေများဖြင့် ရင်ဆိုင်ကြုံတွေ့နေရပြီး နယူးဒေလီမြို့ရောက် မြန်မာနိုင်ငံသားများအနေဖြင့် မိမိတို့ရသင့်ရထိုက်သည့် အခွင့်အရေးများကို UNHCR နှင့်တကွ တာဝန်ရှိသူများထံ တောင်းဆိုကြရန်အတွက် ဇွန်လ ၂၀ ရက်နေ့ နေ့လည် ၂ နာရီတွင် ဂျန်တားမန်တားရပ်ကွက်သို့ လာရောက်ရန် ချင်းဒုက္ခသည်ကော်မတီ (CRC) နယူးဒေလီက ဖိတ်ခေါ်ထားသည်ကို သိရသည်။
ချင်းဒုက္ခသည် ကော်မတီ(CRC) က ဇွန်လ ၇ ရက်နေ့ နံနက် ၁၁ နာရီတွင် အစည်းအဝေးကျင်းပခဲ့ပြီး ၇၄ နှစ်မြောက် ကမ္ဘာဒုက္ခသည်များနေ့တွင် UNHCR အပါအဝင် မိတ်ဖက်အဖွဲ့ အစည်းများမှ ယခုနှစ် ကျင်းပသော အခမ်းအနားတွင် မြန်မာနိုင်ငံသားများ မည်သူမျှ မပါဝင်ကြရန်၊ World Refugee Day ကျင်းပနိုင်ရန်အတွက် BOSCO မှ ထောက်ပံ့မည့် ငွေများကို လုံးဝလက်မခံရန်၊ အထူးသဖြင့် BOSCO, SLIC နှင့်ဆက်စပ်လျက်ရှိသည့် အပြင်ဖြေ (NIOS) ကျောင်းသားများ၊ ကွန်ပျူတာကျောင်းသားများ၊ လူငယ်အသင်းအဖွဲ့များ၊ ဘာသာပြန်များ တို့သည် ၎င်းတို့ ကျင်းပသည့် အစီစဥ်များတွင် မပါဝင်စေရန် ခေါင်းဆောင်က သက်ဆိုင်ရာ Community အသီးသီသို့ အသိပေးရန် ထုတ်ပြန်ထားသည်။
နယူးဒေလီမြို့ရှိ မြန်မာဒုက္ခသည်များအနေဖြင့် ယခုနှစ်ကျရောက်မည့် ကမ္ဘာ့ဒုက္ခသည် နေ့ကို အနှစ်သာရရှိသော နေ့ထူးအဖြစ်သတ်မှတ်ကာ ကျင်းပသွားမည်ဖြစ်ပြီး အစီအစဥ်များကို ထပ်မံအသိပေးမည်ဖြစ်ကြောင်းနှင့် နယူးဒေလီရှိ မြန်မာဒုက္ခသည်များ၏ ရသင့်ရထိုက်သော အခွင့်အရေးများ ရရှိနိုင်ရေး တတ်စွမ်းသမျှ လုပ်ဆောင်သွားမည်ဖြစ်ရာ ပူးပေါင်းပါဝင်ပေးကြပါရန် ချင်းဒုက္ခသည်ကော်မတီ(CRC) နယူးဒေလီ တိုက်တွန်းနိုးဆော် ထားသည်ကို သိရသည်။
သတင်း – James Roe