ပလက်ဝအရေး တွေ့ဆုံ ဆွေးနွေး အဖြေရှာကြရန် လိုအပ်
ခုတလော ခူမီးချင်း တို့သည်လည်း အဖွဲ့ကွဲရန် သို့လော သို့လော ကြားနေရပါသည်။ ထိုသို့ သို့လောသို့လော ကြားရသည်မှာ စည်းလုံးညီညွတ်မှုကို လိုလားသူရင်ထဲ အင်မတန် စိတ်မကောင်းဖြစ်မိပါသည်။ ထိုသတင်း သည် ခူမီးတို့၏ မိမိကံကြမ္မာ မိမိကိုယ်တိုင် ဖန်တီးနိုင်ရန်၊ ဖိနှိပ်မှုမှကင်းဝေးရန်၊ ကိုလိုနီပြုခြင်းခံရခြင်းမှ လွှတ်မြောက်ရန် ကြိုးပမ်းမှုအတွက် သတင်းဆိုးပင် ဖြစ်သည်။ အဖွဲ့ကွဲခြင်းသည် ခူမီးတို့ကို လွှတ်မြောက် မှုရစေမည့် နည်းလမ်းအဖြေ မဟုတ်ဘဲ ခူမီးအချင်းချင်း ပဋိပက္ခများနှင့် အကွဲအပြဲကို ပိုပြီးရင်ဆိုင် ကြုံတွေ့လာနိုင်သည့် လက္ခဏာတစ်ရပ်ပင် ဖြစ်သည်။ ခူမီးအချင်းချင်း စည်းလုံးညီညွတ်မှု မရှိခြင်းသည် ရန်သူကို အားဆေးလောင်းသလို ဖြစ်နေသည်ကို သတိပြု စေလိုသည်။
ထို့ကြောင့် လက်ရှိတွင် ရှိနှင့်ပြီးသားဖြစ်သည့် ခူမီးမျိုးနွယ်စုတို့၏ နိုင်ငံရေးဦးသျှောင် IKACC ကိုသာ ဝိုင်းရံပြီး စုစုစည်းစည်းဖြင့် အင်အားတောင့်တင်းခိုင်မာအောင် တည်ဆောက်စေလိုသည်။
စိတ်ဝမ်းကွဲမည့်အစား IKACC,PC, CDF-Paletwa ၏ မူ မကြိုက်လျင် မူကို ပြင်ရန်နှင့် လူမကြိုက်လျင် လူကို ဖယ်ထုတ်ပြီး လူအစားထိုး၍ အင်အားပိုမိုဖြည့်တင်းရန်သာ လုပ်ဆောင်သင့်သည်ဟု ဖော်ပြလိုသည်။ နွားကွဲလျင် ကျားဆွဲ ခံရတတ်သည်ကို သတိမူစေလိုသည်။ IKACC, PC နှင့် CDF – Paletwa အနေဖြင့်လည်း ပြည်သူလူထုက မူ /လူ ပြင်ရန် တောင်းဆိုသော် ရဲရဲဝံ့ဝံ့ ပြုပြင်ဖို့ သတ္တိရှိကြရန် တိုက်တွန်းလိုသည်။ ထို့အပြင် မည်သည့် ရာထူးအဆင့်အတန်းကို ယူထားသူဖြစ်စေကာမူ ခူမီးချင်း ပြည်သူများက လုံးဝ မလိုအပ်တော့လျင် ရိုးသားစွာ အိပ်ယာလိပ်မည့် ရိုးသားသည့်ဂုဏ်သတ္တိ ရှိရပါမည်။ ထိုမှ ခူမီးပြည်သူများ ယုံကြည်စိတ်ချပြီး စည်းလုံးညီညွတ်မည် ဖြစ်သည်။…
မူကို ပြုပြင်ရာတွင် လက်ရှိအိမ်နီးချင်း နိုင်ငံရေးအခင်းအကျင်းနှင့် ပြည်ထောင်စု နိုင်ငံရေး အခင်းအကျင်းကို ဘက်ပေါင်းစုံ သုံးသပ်ပြီး ဒီရေအတက်အကျပေါ် စီးမျှောနိုင်ရန် လိုအပ်သည်။ ခူမီးတမျိုးသားလုံး တစ်စုတစ်စည်းတည်း ဖြစ်မည်ဆိုလျင် ပလက်ဝအရေးသည် ခူမီးလူမျိုးလက်ထဲ၌သာ ရှိပါလိမ့်မည်။ ထိုသို့ မဟုတ်ပဲ စိတ်ဝမ်းကွဲနေမည်ဆိုလျင် ခူမီးတို့၏ ကံကြမ္မာသည် အခြားလူမျိုးကြီးတို့၏ လက်ထဲ၌ ရှိနေပါလိမ့်မည်။
ခူမီးချင်းလူမျိုးတိုင်း၏ ရင်ထဲတွင် ကိန်းအောင်းနေသည့်အချက်မှာ အေအေအုပ်ချုပ်မှုအောက်တွင် လုံးဝ မနေလိုခြင်းပင် ဖြစ်သည်။ ထိုသို့ ကိန်းအောင်းနေသော်လည်း ဘယ်ရထားတွင် လွဲသနည်းဆိုသော် တွေ့ဆုံ ဆွေးနွေးအဖြေရှာမှု မရှိခြင်းဖြင့် လွဲကုန်ကြလေသည်ဟု မြင်သည်။ အေအေ အုပ်ချုပ်မှုအောက်တွင် မနေလိုလျင် မည်သို့လုပ်ဆောင်ပါက လွှတ်မြောက်နိုင်မည်နည်းဆိုသည့် မေးခွန်းကို တွေ့ဆုံဆွေးနွေးမှု ထပ်ခါတလဲလဲ ပြုလုပ်ပြီး အဖြေရှာဖွေသင့်ပါသည်။
ထိုသို့ တွေ့ဆုံဆွေးနွေးမှုဖြင့် အဖြေမရှာဖွေဘဲ ခူမီးလူကြီး ပုဂ္ဂိုလ်အများစုသည် သေခန်းပြတ်သူများ သဖွယ် စိမ်းကားခဲ့ကြသည်။ တွေ့ဆုံဆွေးနွေးမှု မရှိခြင်းသည် ခူမီးချင်းလူမျိုးတို့ လိုလား တောင့်တကြသည့် လွှတ်မြောက်ခြင်းအရသာနဲ့ ပိုပို၍ အလှမ်းဝေးနေပါအုံးမည်ကို သတိချပ်စေလိုသည်။
ပလက်ဝကို ကိုလိုနီပြုခြင်းမှ သော်လည်းကောင်း၊ အာဏာရှင်စနစ်မှ သော်လည်းကောင်း၊ ဖိနှိပ်မှု အောက်မှသော်လည်းကောင်း လွှတ်မြောက်လိုပါက တစ်ခုတည်းသော နိုင်ငံရေးလမ်းပြမြေပုံကို ရေးဆွဲကြပြီး စစ်ရေး၊ နိုင်ငံရေးအင်အား တောင့်တင်းခိုင်မာအောင် တည်ဆောက်ရန် လိုအပ်သည်။ ထိုသို့ ဖြစ်လာ စေရန် ပြည်တွင်းပြည်ပရှိ နိုင်ငံရေးတက်ကြွသူများ၊ ဘာသာရေးခေါင်းဆောင်များ၊ လူမှုရေးအဖွဲ့အစည်းမှ တာဝန်ရှိသူများ၊ မျိုးနွယ်စုခေါင်းဆောင်များ၊ နည်းပညာရှင်များ၊ ဥပဒေပညာရှင်များ ဝိုင်းဝန်းထောက် ပံ့ရန်နှင့် ပါဝင်ထိုက်သူများအားလုံး ဆွေးနွေးညှိနှိုင်း အဖြေရှာရန် လိုသည်။
မိဘပြည်သူများအနေဖြင့်လည်း ခူမီးချင်း အဖွဲ့အစည်းမကွဲစေရန် မိမိတက်နိုင်သည့်အားဖြင့် တိုက်တွန်း ရန်လိုအပ်သည်။ နောင်တွင် မလိုလားအပ်သည့် ပြဿနာများ မပေါ်ပေါက်စေရန်နှင့် အစိုးရကောင်း တစ်ရပ် ထွက်ပေါ်လာစေရန် ထိန်းကျောင်းရန်မှာ ခူမီးချင်းပြည်သူလူထု၏ တာဝန်တစ်ရပ် ဖြစ်ကြောင်း သိနားလည်ရန် လိုအပ်သည်။
အဖွဲ့ကွဲခြင်း၏ အကျိုးရလာဒ်ကို လက်ရှိ ချင်းနိုင်ငံရေးက စံနမူနာ ပြပေးခဲ့ပြီဖြစ်သည်။ CC နှင့် CB အဖွဲ့ကွဲခြင်းကြောင့် မလိုအပ်ဘဲ ချင်းလူငယ်တို့၏ အသက်ပေါင်းများစွာ ဆုံးရှုံးရပြီး မလိုအပ်သည့် ပဋိပက္ခများနှင့် ဆင်းရဲဒုက္ခများကို ချင်းပြည်သူများ ကြုံတွေ့နေရသည်။ Mara ချင်း နှစ်ဖွဲ့ ကွဲခြင်းကို လည်း သင်ခန်းစာ ကောင်းကောင်း ယူနိုင်ပါသည်။
ခူမီးလူမျိုး တစုတစည်းတည်း ဖြစ်မည်ဆိုလျင် ပလက်ဝဒေသ တည်ငြိမ်အေးချမ်းရေးကို ကျွန်တော်တို့ ကိုယ်တိုင်ကာကွယ်နိုင်သည်။ ပညာရေးမြှင့်တင်နိုင်သည်။ အိန္ဒိယနိုင်ငံနှင့် စီးပွားရေး ကောင်းစွာ လုပ် ဆောင်နိုင်သည်။ ပလက်ဝမြိုနယ် ဖွံ့ဖြိုးတိုးတက်ရေး ဆောင်ရွက်နိုင်သည်။ ကောင်းမွန်သည့် အုပ်ချုပ်ရေး စနစ် ဖော်ဆောင်နိုင်သည်။
ခူမီးလူမျိုးများအနေဖြင့် နှစ်ပေါင်း ၇၀ ကျော် စစ်အာဏာရှင်အုပ်ချုပ်မှုစနစ်ထက် ပိုမိုကောင်းမွန်ပြီး သာယာလှပမည့် ခေတ်သစ်တစ်ခုကို အိမ်မက် မက်စေလိုပြီး ခေတ်မီဖွံ့ဖြိုးတိုးတက်သည့် ခေတ်သစ်တစ်ခုကို ခူမီးမျိုးဆက်သစ်များအတွက် ဖန်တီးပေးရန် လိုအပ်သည်။ ထို့အတူ ULA/AA ၏ အုပ်ချုပ်မှု အိမ်မက်ဆိုးကြီးမှလည်း အလျင်အမြန် နိုးထနိုင်ရန် စည်းလုံးညီညွတ်ရေးအားဖြင့် ရုန်းကန်စေလိုပါသည်။ အိမ်မက်ဆိုးမှ နိုးထနိုင်ရန် စည်းလုံးညီညွတ်မှုအား လိုအပ်သည်။
နိဂုံးအားဖြင့် ခူမီးမျိုးနွယ်စုခေါင်းဆောင်များ၊ ဘာသာရေးခေါင်းဆောင်များ၊ နိုင်ငံရေးတက်ကြွ လှုပ်ရှား သူများ၊ လူငယ်အဖွဲ့အစည်းများ၊ ပြည်တွင်းပြည်ပ ပညာရှင်များ၊ လူမှုအဖွဲ့အစည်း ခေါင်းဆောင်များအနေဖြင့် ခူမီးချင်းလူမျိုးတို့၏ ဘဝကို အာမခံချက်အပြည့်အဝရရှိရန်နှင့် ပိုမိုကောင်မွန်သည့် နိုင်ငံရေးအခင်းအကျင်းကို မျိုးဆက်သစ်များအတွက် ဖန်တီးပေးရန် နေ့ညမအား တွေ့ဆုံ ဆွေးနွေးမှုများပြုလုပ်ပြီး အဖြေရှာကြရန် လိုအပ်ပြီဖြစ်ကြောင်းနှင့် ခူမီးအမျိုးသား အင်အားတောင့်တင်းရေးနှင့် စည်းလုံးညီညွတ်ရေးကို ဦးထိပ်ထားပြီး ဝိုင်းဝန်းတည်ဆောက်ကြရန် အလေးအနက် ဖော်ပြလိုပါသည်။
စာကြွင်း။ ယနေ့တော်လှန်ရေးသည် ၂၀၀၈ ဖွဲ့စည်းပုံ မူကို မကြိုက်မနှစ်သက်၍ တော်လှန်နေခြင်းဖြစ်ပြီး ၎င်းမူအောက်တွင် ပြန်နေမည်ဆိုလျင် တော်လှန်ရေးသည် အချည်းနှီးသာဖြစ်သည်။ အင်္ဂလိပ် အုပ်ချုပ်မှုကို မကြိုက်၍ ဂျပန်နှင့်ပေါင်းသည်။ ဂျပန် အုပ်ချုပ်မှုကို မကြိုက်ပြန်၍ အင်္ဂလိပ်နှင့် ပြန်ပေါင်းသည်။ မူဟောင်းကို ပြန်ကြိုက်၍ ပေါင်းခြင်းမဟုတ်။ စစ်မှန်သော လွတ်လပ်ရေး ရရန် ပေါင်းခြင်းဖြစ်သည်။ တကယ်လည်း လွတ်လပ်ရေး ရခဲ့သည်။ မူဟောင်းကို ပြန်ပေါင်းမည်ဆိုလျင် ခူမီးလူမျိုးတို့၏ စစ်မှန်သော ကိုယ်ပိုင်ပြဋ္ဌာန်းခွင့် အပြည့်အဝရရန် အာမခံချက်ရှိမှသာ ပေါင်းသင့်ပြီး မူဟောင်းအောက်တွင် ပြန်ဝင်အောင်းခြင်း မဖြစ်သင့်ပေ။ အဆိုးသံသရာ၌ တဝဲဝဲလည်နေခြင်းမျိုး မဖြစ်သင့်ပေ။ နစ်နာသည်မှာ မိမိလူမျိုးနှင့် မိမိဒေသ သာဖြစ်သည်။
Surai Mang