တွီဒန်းကျေးရွာရှိ စစ်ရှောင်ပြည်သူများနှင့် ဒေသခံပြည်သူများ၏ တောင်ယာစပါးခင်းမှ စပါးများကို ကြွက်များက စားသောက်ဖျက်ဆီးနေလျက်ရှိ
စက်တင်ဘာလ ၁၂ ရက်၊ ၂၀၂၅။
အိန္ဒိယနိုင်ငံ၊ မီဇိုရမ်ပြည်နယ်၊ လောင်တလိုင်ခရိုင်၊ တွီဒန်းကျေးရွာရှိ စစ်ရှောင်ပြည်သူများနှင့် ဒေသခံပြည်သူများ၏ တောင်ယာစပါးခင်းတွင် ကြွက်များ အစုလိုက်အပြုံလိုက် သောင်းကျန်းနေပြီး စပါးများကို ကိုက်ဖျက်ကာ စားသောက်ဖျက်ဆီးနေလျက်ရှိကာ တောင်ယာစပါးများ ရိတ်သိမ်း၍မရကြောင်း တွီဒန်းကျေးရွာရှိ စစ်ရှောင်များထံမှ ယနေ့ စက်တင်ဘာလ ၁၂ ရက်နေ့တွင် သိရသည်။
တောင်ယာစပါးများသည် ဩဂုတ်လကုန်ပိုင်းမှစ၍ မှည့်နေပြီဖြစ်ကာ ကြွက်များသည် တစ်နေ့ထက်တစ်နေ့ ပွားများလာပြီး စပါးများ မှည့်လာသည်နှင့်အမျှ ကိုက်ဖျက်စားသောက်နေခြင်း၊ စပါးခင်းများကို ဖျက်ဆီးခြင်းများ ပြုလုပ်နေကြကြောင်း စစ်ရှောင်တစ်ဦးက ပြောသည်။
“တချို့တောင်ယာတွေက စပါးပင်တွေက ဘာမှမကျန်တော့ဘူး။ တောင်ယာစပါးတွေက အခုထိတော့ အကုန်တော့ မမှည့်သေးဘူး။ ဒါပေမယ့် မှည့်တဲ့ စပါးခင်းကဟာတွေကိုတော့ များသောအားဖြင့် ကိုက်ဖျက်စားသောက်ကြတာပါပဲ။ တောင်ယာစပါး အထွက်နှုန်းက ဒီနှစ်တော့ အခြေအနေကောင်းတော့မှာ မဟုတ်တော့ဘူး…” ဟု စစ်ရှောင်ပြည်သူတစ်ဦးက ကြုံတွေ့နေရသည့် အဖြစ်အပျက်ကို ခူမီးမီဒီသို့ ပြောပြသည်။
တောင်ယာစပါးခင်းများသည် စစ်ဘေးရှောင်ပြည်သူ အိမ်ခြေ ၁၅၀ ဝန်းကျင်နှင့် တွီဒန်းကျေးရွာ ဒေသခံပြည်သူ ၁၅၀ ဝန်းကျင် တို့၏ဖြစ်ကြပြီး စုစုပေါင်း အိမ်ခြေ ၃၀၀ ဝန်းကျင်ခန့် ရှိမည်ဖြစ်ကာ အနည်းဆုံး စပါး ၂ တင်းဆန့် စိုက်ပျိုးသည့် တောင်ယာခင်းများဖြစ်ကြသည်။
“ကြွက်တွေက တောင်ယာစပါးတွေ မစားခင်မှာ ပြောင်းဖူးတွေကို အရင်ဦးဆုံး ကိုက်ဖျက်စားသောက်ကြတာ။ အခုက အားလုံးကိုက်ဖျက်စားသောက်လိုက်တာ မဟုတ်သေးပေမယ့် စပါး ၂ တင်း စိုက်တဲ့တောင်ယာတွေမှာ ၁ တင်းကျော်လောက်ကို စားပစ်လိုက်ကြပြီ။ သုံးပုံ တစ်ပုံကျော်ကျော်လောက်ကို စားပစ်ကြတာ။ အဦးအသီးတွေကအစ အကုန် ကိုက်ဖြတ်စားသောက်ကြတာ။ တောင်ယာလုပ်တဲ့အလျောက် ရရမယ့်ဟာကို ခုက ကြွက်တွေသောင်းကျန်းတာနဲ့ သွားပြီ။ ခုက တောင်ယာစပါးက ရဖို့မသေချာတော့ဘူး…” ဟု စစ်ရှောင်ပြည်သူတစ်ဦးက ခူမီးမီဒီယာသို့ ယူကြုံးမရ ပြောသည်။
စစ်ရှောင်စခန်းတာဝန်ရှိသူတစ်ဦးကလည်း ယခုကဲ့သို့ ပျက်စီးဆုံးရှုံးသွားရသည့်အပေါ်တွင် “အခုချိန်မှာ စစ်ရှောင်ပြည်သူတွေက အခက်အခဲဒုက္ခနဲ့ ကြုံတွေ့ရတော့မှာ အမှန်ပဲ။ ပြည်တွင်း/ပြည်ပက အဖွဲ့အစည်းတွေက ဒီသတင်းကိုကြားပြီးတော့ ကူညီးပံ့ပိုးပေးနိုင်ရင် ပေးစေချင်ပါတယ်။ ကူညီပေးဖို့လည်း မေတ္တာရပ်ခံပါတယ်။ ဆန်စပါးက အဓိကဆိုပြီး လုပ်တာမှာ ခုလိုဆုံးရှုံးရတော့ ပြောစရာစကားတောင် မရှိတော့ဘူး…” ဟု မေတ္တာရပ်ခံထားသည်။
“စစ်ဘေးရှောင်ပြည်သူတွေအပြင် တွီဒန်းကျေးရွာ ဒေသခံပြည်သူတွေကိုယ်တိုင်လည်း ခုလို သဘာဝဘေးအန္တရာယ်ကြောင့် ထိခိုက်နစ်နာ ဆုံးရှုံးရတာပါပဲ။ ဒေသခံပြည်သူတွေအတွက်လည်း သက်ဆိုင်ရာ အစိုးရအဖွဲ့စည်းတွေကလည်း အကူအညီအထောက်ပံ့ ပေးဖို့အတွက်ကိုလည်း မေတ္တာရပ်ခံ တောင်းဆိုချင်ပါတယ်။ အသိပေးချင်ပါတယ်။ သူတို့လည်း ကျွန်တော်တို့ စစ်ရှောင်ပြည်သူတွေလိုပဲ ခက်ခဲမှုတွေ အများကြီးရှိတယ်။ သူတို့အတွက်လည်း အကူအညီအထောက်အပံ့ရရှိခဲ့ရင် နစ်နာဆုံးရှုံးမှုအတွက် ခံသာမှုရှိမယ်လေ။ အခုက အခက်အခဲဒုက္ခကြုံတွေ့နေရတာက အတူတူပါပဲလေ…” ဟု ဆက်လက်၍ စစ်ရှောင်စခန်းတာဝန်ရှိသူတစ်ဦးက ငြိုးငယ်စွာပြောသည်။
တွီဒန်းကျေးရွာ ဒေသခံများက ပလက်ဝမြို့နယ်မှ ရောက်ရှိလာသည့် စစ်ဘေးရှောင်ပြည်သူများကို နေထိုင်ရန် မိမိတို့၏ မြေနေရာကို ချပေးသည်နည်းတူ တောင်ယာလုပ်ရန်အတွက်လည်း တောင်ယာခင်းများကို ပေးထားပြီး ထိုကဲ့သို့ ခွင့်ပြုပေးသောကြောင့် တွီဒန်းကျေးရွာ ဒေသခံများကို အများကြီး ကျေးဇူးတင်ရှိကြောင်း စစ်ရှောင်ပြည်သူများက ဆိုသည်။
လက်ရှိတွင် တွီဒန်းမှာ Sam Theng, Sam Mang ဟုခေါ်သည့် ဝါးများသည် အပွင့်ပွင့်ခြင်း၊ အသီးသီးခြင်း စသည်တို့ဖြစ်ပေါ်နေပြီး ယခုကဲ့သို့ ဖြစ်ပေါ်လာသည်နှင့်အမျှ ကြွက်များသည်လည်း ပိုမို ပွားများလာသည်။
“စစ်ဘေးရှောင်နေရလို့ စားဝတ်နေရေး အဆင်မပြေရတဲ့ကြားက ခုလို တောင်ယာစပါးတွေကို ကြွက်တွေက ကိုက်ဖျက်စားသောက် ဖျက်ဆီးပစ်တာကြောင့် လာမယ့်နေ့တွေမှာ ပိုပြီးခက်ခဲသွားရတော့မှာ။ ဘယ်လိုလုပ်ရမလဲ မသိတော့ဘူး။ အားလုံးလည်း ဝမ်းနည်းပူဆွေးနေကြတယ်…” ဟု စစ်ရှောင်ပြည်သူတစ်ဦးက ခူမီးမီဒီယာသို့ စိတ်မကောင်းစွာ ပြောသည်။
သတင်း – James Roe