မီဇိုရမ်ပြည်နယ်ရှိ စစ်ရှောင်စခန်းများတွင် ကလေးများအတွက် ပရိုတင်းအားဆေးဗူးများ အထောက်အပံ့ရရှိ
မတ်လ ၂၀ ရက်၊ ၂၀၂၅။
မီဇိုရမ်ပြည်နယ် ပလက်ဝဒေသခံ စစ်ရှောင်စခန်းများရှိ ကလေးသူငယ်များအတွက် ပရိုတင်းကလေးအားဆေးဗူးများကို နော်ဝေနိုင်ငံ Carson Baptish Church အသင်းတော်မှ အထောက်အပံ့ရရှိကြောင်း စစ်ရှောင်စခန်းတာဝန်ခံများထံမှ သိရသည်။
“ကလေးတွေအတွက် အားဆေးတွေကို နော်ဝေနိုင်ငံ Carson Baptish Church အသင်းတော်က ကူညီပေးပါတယ်။ အခု ကာကီ၊ လုံပူးနဲ့ ခိန်ခေါင်က စစ်ရှောင်ကလေးတွေကို တစ်ရွာကို ဗူး ၉၀ စီ ပို့ခဲ့ပြီးတော့ ဝေပေးခဲ့ပြီးဖြစ်တယ်။ ပြီးခဲ့တဲ့လကလည်း တွီဒန်းကျေးရွာကိုလည်း ပေးဝေခဲ့ပါပြီ။ ခုလို စစ်ရှောင်ကလေးတွေအတွက် ကူညီပေးတဲ့သူတစ်ယောက်ချင်းစီကိုလည်း ကျေးဇူးတင်ပါတယ်…” ဟု ပလက်ဝကောင်စီ၊ လူမှုဝန်ထမ်းနှင့် ကူညီကယ်ဆယ်ရေးဌာနတာဝန်ခံမှ ခူမီးမီဒီယာသို့ပြောသည်။
မီဇိုရမ်ပြည်နယ် ကာကီကျေးရွာ၊ လုံပူးကျေးရွာနှင့် ခိန်ခေါင်ကျေးရွာများတွင်ရှိသည့် ပလက်ဝမြို့နယ်မှ စစ်ဘေးရှောင် ကလေးသူငယ်များအတွက် နော်ဝေနိုင်ငံ Carson Baptish Church အသင်းတော်မှ အထောက်အပံ့ပေးသည့် ပရိုတင်းအားဆေးဗူး တစ်ရွာလျှင် ၉၀ ဗူး ရရှိပြီး စစ်ရှောင်စခန်းတာဝန်ရှိသူများမှ ကလေးများကို ပြီးခဲ့သည့်အပတ်အတွင်း ပေးဝေခဲ့ကြောင်း စစ်ရှောင်စခန်း တာဝန်ခံထံမှ သိရသည်။
ပလက်ဝမြို့နယ်မှ စစ်ရှောင်လာသည့်ပြည်သူများသည် ကာကီကျေးရွာတွင် အိမ်ထောင်စု ၂၇၃ စု ရှိပြီး အမျိုးသား ၅၈၆ ဦး၊ အမျိုးသမီး ၆၇၄ ဦး စုစုပေါင်းလူဦးရေ ၁၂၆၀ ဦး၊ လုံပူးကျေးရွာတွင် အိမ်ထောင်စု ၁၃၂ စု ရှိပြီး အမျိုးသား ၃၀၃ ဦး၊ အမျိုးသမီး ၂၉၄ ဦး စုစုပေါင်းလူဦးရေ ၅၉၄ ဦးနှင့် ခိန်ခေါင်ကျေးရွာတွင် အိမ်ထောင်စု ၁၃၉ စု ရှိပြီး အမျိုးသား ၂၅၀ ဦး၊ အမျိုးသမီး ၂၇၅ ဦး စုစုပေါင်းလူဦးရေ ၅၂၅ ဦး အသီးသီး ရောက်ရှိနေထိုင်နေကြကြောင်း စစ်ရှောင်စခန်းတာဝန်ခံများထံမှ သိရသည်။
သတင်း – James Roe
Photo by Raiki Kaseaung
ပုံစာ – ကာကီ၊ လုံပူးနှင့် ခိန်ခေါင်ကျေးရွာ စစ်ရှောင်စခန်းများတွင် ကလေးများအား ပရိုတင်းအားဆေးဗူးများ လက်ခံရရှိနေသည့်ပုံ။