စစ်ကိုင်းနှင့် မကွေးအစပ်ရှိ အကြမ်းဖက်စစ်ကောင်စီတပ်စခန်းများကို CDF-KKG major operation မြေပြန့်လွင်ပြင်စစ်ဆင်ရေး ဆင်နွှဲ
ဧပြီလ ၂၄ ရက်၊ ၂၀၂၅။
ပထမဆုံးအကြိမ်အဖြစ် မြေပြန့်လွင်ပြင်စစ်ဆင်ရေး ဆင်နွှဲရာတွင် အကြမ်းဖက်စစ်ကောင်စီ၏ စခန်း ၅ ခုကို ချင်းအမျိုးသားတပ်မတော်နှင့် ချင်းတော်လှန်ရေးပူးပေါင်းတပ်က ဖေဖော်ဝါရီလ ၁၂ ရက်နေ့မှ စတင်၍ တိုက်ခိုက်ခဲ့ပြီး ဧပြီလ ၂၀ ရက်နေ့တွင် သိမ်းယူထားနိုင်ကြောင်း သိရသည်။
နှစ်လတာအတွင်း စစ်ကိုင်းတိုင်းနှင့် မကွေးတိုင်း အစပ်ရှိ အကြမ်းဖက်စစ်ကောင်စီ၏ စခန်းများဖြစ်သည့် ကမ်းပါးနီစခန်း၊ မှန်တော၊ အရှေ့အောင်သာယာ ၊ အနောက်အောင်သာယာ ၊ ကြံသာစသည့် စခန်းငါးခုကို သိမ်း ပိုက်နိုင်ခဲ့ပြီး ချင်းအမျိုးသားတပ်မတော်အပါအဝင် ချင်းတော်လှန်ရေးတပ်များနှင့် မဟာမိတ်တပ်ပေါင်းစုများ ပူးပေါင်း၍ CDF-KKG Operation အဖြစ် စုဖွဲ့လေ့ကျင့်ပြင်ဆင်ကာ တိုက်ခိုက်ခဲ့ခြင်းဖြစ်ကြောင်း ဧပြီလ ၂၀ ရက်က CNF/CNA နှင့် CDF-KKG ပူးတွဲသတင်းစာရှင်းလင်းပွဲတွင် ပြောဆိုသွားသည်ကို သိရသည်။
စစ်ကိုင်းတိုင်းနှင့် မကွေးတိုင်းနယ်နိမိတ်အစပ်တွင်ရှိသည့် စစ်အုပ်စုစခန်းများကို သိမ်းယူနိုင်ခြင်းသည် စစ်ရေး၊ နိုင်ငံရေးနှင့် ကုန်သွယ်ရေးအရ အရေးပါသည့် ဗျူဟာလမ်းကြောင်းပေါ်တွင်ရှိသည့်အတွက် ပထမဆုံးအကြိမ် စစ်ဆင်ရေးဆင်နွှဲခဲ့ခြင်း ဖြစ်ကြောင်း၊ အကြမ်းဖက် စစ်ကောင်စီနှင့် လက်အောက်ခံတပ်များက ချင်းတော်လှန်ရေးရဲဘော်များကို အရှင်လတ်လတ် မီးရှို့၍အသတ်ခံရခဲ့ရသလို ဒေသခံများသည်လည်း စစ်ဘေးရှောင်ရင်း ထိတ်လန့်ကြောက်ရွံ့နေရသည့် နယ်မြေလည်းဖြစ်ပြီး စစ်ကောင်စီ၏ ဒီဇင်ဘာလတွင် အကောင်ထည်ဖော်မည့် ရွေးကောက်ပွဲအတွက် ပြုလုပ်နိုင်ရန် အားကောင်းသည့်နေရာလည်း ဖြစ်သောကြောင့် စစ်ဆင်ရေးဖော်ဆောင်ခဲ့ခြင်းဖြစ်ကြောင်း သိရသည်။
ချင်းပြည်နယ်အတွင်းတွင် တီးတိန် ၊ ဟားခါး၊ ထန်တလန် ၊ ခိုင်ကမ်း စသည့် မြို့နယ်လေးခုမှာသာ စစ်အုပ်စုအထိုင်စခန်းများ ကျန်နေပြီး ချင်းတော်လှန်ရေးတပ်များက ဦးဆောင်၍ မြေပြန့်ဘက်တွင် ပထမဆုံးအကြိမ်အဖြစ် စစ်ကိုင်းနှင့်မကွေးအနီးရှိ စစ်အုပ်စုစခန်းများကို ယခုကဲ့သို့ ထိုးစစ်ဆင် တိုက်ခိုက်သိမ်းပိုက်ခဲ့ခြင်းဖြစ်ကြောင်း သိရသည်။
တိုက်ပွဲအတွင်း စစ်အုပ်စု အလောင်း ၅၀ ကျော်နှင့် လက်နက်အများအပြား သိမ်းဆည်းရရှိပြီး ဒုဗိုလ်အဆင့် အပါအဝင် စစ်သုံ့ပန်း ၁၀ ဦးကျော် အရှင်ဖမ်းမိခဲ့ပြီး CDF – KKG ဘက်က ရဲဘော် ၁၁ ဦး အပါအဝင် တော်လှန်ရေးတပ်ဖွဲ့ဘက်က ရဲဘော် ၂၀ ဦး ကျဆုံးကာ ၇၀ ဦးကျော် ထိခိုက်ဒဏ်ရာရရှိခဲ့ကြောင်း သိရသည်။
ကလေးနယ်တောင်ပိုင်းတွင် ၉၅ ရာခိုင်နှုန်းကျော် တော်လှန်ရေးအဖွဲ့များက ထိန်းချုပ်ထားနိုင်ပြီဖြစ်ကြောင်းနှင့် ချင်းပြည်နယ်နှင့် နယ်နမိတ်ထိစပ်နေသည့် ကလေးတောင်ပိုင်းနှင့် မကွေးတိုင်း ကလေး-ဂန့်ဂေါလမ်းပိုင်းက စစ်အုပ်စုစခန်းများကိုလည်း ဆက်လက်၍ တိုက်ခိုက်သွားမည်ဖြစ်ကြောင်း ထုတ်ပြန်ထားသည်ကို သိရသည်။
မြေပြန့်လွင်ပြင် စစ်ဆင်ရေးကို CNF/CNA ဦးဆောင်ကာ CDF-KKG ၊ CDF-Hakha ၊ CDF-Thangtlang ၊ CDF CDM – Siyin စသည့် ချင်းတော်လှန်ရေးတပ်များနှင့် မဟာမိတ်တပ်ဖွဲ့ဝင်များဖြစ်သည့် ABSDF ၊ ယောဒေသ လွတ်မြောက်ရေး တပ်ပေါင်းစု (CDF – Senthang ၊ နဂါးညီနောင်၊ ဟံသာဝတီပကဖ၊ ကလေးဒေသ တော်လှန်ရေး အင်အားစု ၊ Ranger Kalay Defend Force (RKDF) စသည့် တပ်ဖွဲ့များက ပူးပေါင်းဆင်နွှဲခဲ့ခြင်းဖြစ်ကြောင်း သိရသည်။
သတင်း – James Roe