ပလက်ဝ CDF ကျပ်သိန်း ၃၀၀၀ ရန်ပုံငွေကမ်ပိန်းပြုလုပ်နေ

ချင်းပြည်နယ်၊ ပလက်ဝမြို့နယ် ချင်းမြေကာကွယ်ရေးတပ်ဖွဲ့ (ပလက်ဝ)နှင့် ပလက်ဝဒေသန္တရအစိုးရ၊ ပလက်ဝ ကောင်စီ(PC)၏ လိုအပ်ချက်များကို ဖြည့်ဆည်းနိုင်ရေးအတွက် ကျပ်သိန်း ၃၀၀၀ ရန်ပုံငွေ ရှာဖွေနိုင်ရေးကို “အရှိန်အဟုန်မြှင့်တင် ကီမိုမြေတခွင်” အမည်ဖြင့် ကမ်ပိန်းကို နိုဝင်ဘာလ ၅ ရက်နေ့က စတင်ပြုလုပ်နေကြောင်း သိရသည်။

ကမ်ပိန်းကာလမှာ ယခုနှစ် နိုဝင်ဘာလ ၅ ရက်မှ ၂၀၂၅ ဇန်နဝါရီလ ၅ ရက်အထိ ၃ လတာကြာမြင့်မည်ဖြစ်ပြီး ကြားကာလခူမီး(ချင်း)မျိုးနွယ်စုများရေးရာ အတိုင်ပင်ခံကောင်စီ (IKACC)နှင့် ပလက်ဝကောင်စီ(PC)တို့ ဦးဆောင်ပြုလုပ်ခြင်း ဖြစ်ကြောင်းသိရသည်။ အဆိုပါ ကမ်ပိန်းမှ ရရှိသည့်ဘဏ္ဍာငွေများကို ဒေသန္တရအစိုးရ ပလက်ဝကောင်စီ၏ ဌာနများဖြစ်သော ကာကွယ်ရေး၊ ရဲတပ်ဖွဲ့၊ ပညာရေး၊ ကျန်းမာရေးနှင့် ဒေသတွင်းစစ်ဘေး ရှောင်များအတွက် လူသားစာနာမှုအကူအညီပေးအပ်သည့် လုပ်ငန်းစဉ်များတွင် သုံးစွဲသွားမည်ဖြစ်ကြောင်း ကမ် ပိန်းတာဝန်ရှိသူ၏ ပြောကြားချက်အရ သိရသည်။

ကာကွယ်ရေးဌာနဖြစ်သည့် CDF – ပလက်ဝ အနေဖြင့် ယခင်က ပရောဂျတ်ကီမိုအမည်ဖြင့် နှစ်ကြိမ်ပြုလုပ်ခဲ့ဖူး ပြီး ယခုအကြိမ်မှာ တတိယအကြိမ်ဖြစ်ကြောင်းသိရပြီး ကဏ္ဍပေါင်းစုံတွင် ဘဏ္ဍာရေးလိုအပ်ချက် များစွာရှိနေ သည့်အတွက် နောင်တွင်လည်း ဆက်လက်ပြုလုပ်သွားရန် စီစဉ်ထားရှိကြောင်း သိရသည်။